Pune Hinjewadi-Shivajinagar Metro: हिंजवडी मेट्रो चार नोव्हेंबरपासून सुरू होणार असली, तरी सुरुवातीचे काही दिवस मेट्रोच्या सध्याच्या दोन मार्गिकांवरील प्रवाशांना जिल्हा न्यायालयापासून हिंजवडी मार्गिकेसाठी स्वतंत्र तिकीट काढावे लागणार आहे.

शहरातील बहुप्रतीक्षित हिंजवडी-शिवाजीनगर मेट्रो प्रकल्पाचे लोकार्पण पंतप्रधान नरेंद्र मोदी यांच्या हस्ते तीन नोव्हेंबरला सकाळी झाल्यावर प्रवाशांसाठी ही मेट्रोसेवा बुधवारी (४ नोव्हेंबर) सकाळी सहापासून सुरू होणार आहे. या मेट्रोतून जिल्हा न्यायालय ते हिंजवडी फेज ३ (मेगापोलिस सर्कल) पर्यंत प्रवास करण्यासाठी ६२ रुपये मोजावे लागणार आहेत. गर्दीच्या वेळी दर सहा मिनिटांनी; तर कमी गर्दीच्या वेळेत दर १२ मिनिटांनी मेट्रोसेवा उपलब्ध असेल.

पुणे महानगर प्रदेश विकास प्राधिकरणाचे (पीएमआरडीए) महानगर आयुक्त अभिजित चौधरी यांनी मेट्रो उद्घाटनाविषयी माध्यमांना सविस्तर माहिती दिली. मेट्रोच्या उद्घाटन कार्यक्रमासाठी मुख्यमंत्री देवेंद्र फडणवीस आणि उपमुख्यमंत्री सुनेत्रा पवार बालेवाडी येथे उपस्थित राहणार आहेत. ‘पहिल्या टप्प्यात मेट्रोची १७ स्थानके सुरू होणार असून, उर्वरित सहा स्थानके जानेवारी २०२७ पर्यंत टप्प्याटप्प्याने सुरू होतील,’ असे त्यांनी सांगितले.

‘हिंजवडी मेट्रोसाठी २२ ट्रेनचे संच उपलब्ध असून, ही पिंक लाइन किंवा पुणेरी मेट्रो म्हणून ओळखली जाणार आहे. या शहरातील इतर दोन मेट्रो मार्गिकांप्रमाणे सकाळी सहापासून मेट्रोसेवा सुरू होतील. रात्री ११ वाजून ४० मिनिटांनी जिल्हा न्यायालय येथून शेवटची ट्रेन हिंजवडीच्या दिशेने येईल,’ अशी माहिती अभिजित चौधरी यांनी दिली. ‘केंद्र सरकारच्या मेट्रो धोरण २०१७ अंतर्गत मंजूर झालेला हा पहिला प्रकल्प असून, सार्वजनिक-खासगी भागीदारी (पीपीपी) स्वरूपात हा प्रकल्प असल्याने इतर मेट्रो प्रकल्पांपेक्षा या मेट्रोचे तिकीट दर अधिक आहेत,’ याची कबुली चौधरी यांनी दिली.

महाराष्ट्र मेट्रो रेल्वे कॉर्पोरेशनच्या (महामेट्रो) मोबाइल ॲपमध्ये त्याची सुविधा उपलब्ध करून देण्यात येणार आहे. सर्व तिन्ही मार्गिकांवरील प्रवाशांना एकाच तिकिटात प्रवास करता यावा, यासाठीचे प्रयत्न सुरू असून, पुढील काही दिवसांत त्याची सोय उपलब्ध करून दिली जाणार असल्याचे वरिष्ठ अधिकाऱ्यांनी सांगितले. सध्या नागरिकांना तिकीट खिडकीसह क्यूआर कोड किंवा व्हॉट्सअपद्वारे तिकीट काढता येणार आहे. व्हॉट्सॲपवर तिकीट उपलब्ध होणार असलाने प्रवाशांना तिकिटासाठी रांगेत उभे राहावे लागणार नाही.

मेट्रोच्या गर्दीच्या वेळा वेगळ्या ?
हिंजवडी-शिवाजीनगर मेट्रो सेवा गर्दीच्या वेळेत सकाळी ७.३० ते ९.३० आणि सायंकाळी चार ते सात या वेळेत दर सहा मिनिटांना प्रवाशांना मिळणार आहे; तर उर्वरित वेळेत दर १२ मिनिटांनी मेट्रो धावणार आहे. मात्र, 'महामेट्रो' आणि पुणेरी मेट्रोच्या गर्दीच्या वेळांमध्ये फरक आहे. 'महामेट्रो'च्या दोन मार्गिकांवर गर्दीच्या वेळा (सकाळी ८ ते ११ व सायं. ४ ते ८) वेगळ्या आहेत. त्यामुळे शहरातील तिन्ही मेट्रो मार्गिकांवर गर्दीच्या वेळा एकच राहाव्यात, अशी प्रवाशांची अपेक्षा आहे.

संपूर्ण प्रवासासाठी ४५ मिनिटे
हिंजवडी-शिवाजीनगर दरम्यान पहिल्या ते अखेरच्या स्थानकापर्यंत प्रवास करण्यासाठी ४५ मिनिटे लागतील, असा अंदाज आहे. सुरुवातीला १७ स्थानके खुली होणार असल्याने कदाचित ही वेळ कमी होऊ शकते; पण सर्व स्थानके सुरू झाल्यानंतर या प्रवासाकरिता अधिकचा वेळ लागू शकतो. मात्र, सध्या हिंजवडीला जाण्यासाठी आयटी कर्मचाऱ्यांना दीड ते दोन तास लागतात. या तुलनेत अनेक कर्मचाऱ्यांचा वेळ वाचणार आहे.

अनेकदा मुदतवाढ
हिंजवडी-शिवाजीनगर मेट्रो प्रकल्पाचे भूमिपूजन पंतप्रधान नरेंद्र मोदी यांच्या हस्तेच नोव्हेंबर २०१८ मध्ये झाले होते. त्यानंतर हा प्रकल्प पाच वर्षांत पूर्ण होणे अपेक्षित होते. करोनामुळे त्याला मुदतवाढ मिळाली, तरीही मार्च २०२५ पर्यंतची डेडलाइन देण्यात आली होती. मात्र, किमान सहा ते आठ मुदतवाढीच्या तारखा जाहीर झाल्यानंतर आणि त्या सर्व तारखा उलटून गेल्यानंतर मोदी यांच्याच हस्ते जवळपास नऊ वर्षांच्या प्रदीर्घ कालखंडानंतर हिंजवडी मेट्रो अखेर खुली केली जाणार आहे. बहुसंख्य मेट्रो प्रकल्प उद्घाटनाच्या दिवशीच व्हीआयपींचा ताफा गेल्यानंतर दोन ते तीन तासांत प्रवाशांसाठी खुले होतात. मात्र, हिंजवडी मेट्रोने यातही वेगळेपणा जपला असून, तीन नोव्हेंबरला फक्त उद्घाटन आणि चार नोव्हेंबरपासून सेवा असा नवा पायंडा पाडला आहे.

तिकीट दर असे आहेत...
 

• ०-२ किमी १२ रुपये

• २-४ किमी २५ रुपये

• ४-८ किमी ३७ रुपये

• ८-१२ किमी ४५ रुपये

• १२-१८ किमी ४९ रुपये

• १८ किमीच्या पुढे ४५ रुपये